Manchester United manager Erik Ten Hag chuan tun nipui bazara striker thar lâkluh ngei an tum thu a sawi a, chumi tur atan chuan club in a tih theih zawng zawng a ti ang.
Red Devils hian season hmasa zawh tirh phat ata striker lâkluh tumin hma an la tan a, amaherawhchu tun thlengin Man Utd team ah striker thar hmel kan la hmu lo. Engpawhnise United hian striker thar an mamawh hle a, transfer window inkhar hma ngei a centre forward thar an lâkluh a rinawm.
Striker thar lâkluh ngei an tum thu Ten Hag chuan hetiang hian a sawi, ” He team tana mi dik ber lalut turin club in a tih theih zawng zawng a ti ang. Kan lâkluh tum te kan hria a, a hlawhtlin theihnan kan tih theih engkim leh kan theihna zawng zawng kan hlan ang. Helai huam chhung (center forward) hi tun aia hma sawn kan ngaihna hmun a ni” a ti.
United hian Harry Kane an beisei hman viau naa Spurs striker hian Bundesliga champion Bayern Munich zawm a duh a, mimal inremna pawh a neihpui tawh nia report a ni.
Tin, Victor Osimhen chu Man Utd nena sawizawm striker dang a ni leh a, amaherawhchu Napoli lamin an striker mana an sum phut zat a tam lulai êm avangin Red Devils hian an beisei ngam lo.
Tun dinhmunah Atalanta striker Rasmus Hojlund chu Man Utd top target a ni mêk a, kum 20 a upa manah Man Utd chuan £40 million leh player pêk tel inhuam mahse Atalanta lam erawhin sum fai £85 million an duh thung.
Hojlund chungchangah Man Utd leh Atalanta te an la inrem hnai lova, chutihrualin Red Devils hian player hralhna atanga sum thahnem tak an hailuh ve dawn tho avangin Hojlund hi an lalut thei mai pawhin a rinawm.
Hetih mêk lai hian PSG lam pawhin thawm an rawn nei thar viau a, Ligue 1 champion hian Hojlund hi an ngaihven tan hle nia report a ni. Kylian Mbappe chuan kuminah Parc des Princes a chhuahsan ngei a rinawm a, hetiang anih chuan PSG hian Mbappe thlâktu turin Atalanta striker Rasmus Hojlund emaw Juventus striker Dusan Vlahovic te chu lâkluh an tum ang.