Steven Gerrard’an Chelsea star a fak

Aston Villa manager Steven Gerrard chuan Chelsea star Mason Mount chu fakin, England player tha ber pakhat a nih thu a sawi. Pathianni khian Chelsea chuan Aston Villa an tlawh dawn a, Covid 19 hri in team pahnih te hi ti buai mahse, an inhmachhawn ngei dawn niin a lang.

Mason Mount pawh Chelsea tan a khelh ngei a rinawm bawk a. Mason Mount hi tun season Premiere League khelh mekah Chelsea player che tha ber pakhat niin, Chelsea tana goal khung hnem ber a ni mek bawk. Tun Season khelh mek all competion ah goal 7 a khung a ni.

Chelsea leh Aston Villa inhmachhwan tur chungchangah Villa Boss Steven Gerrard chuan Mason Mount hi a fak a, club leh ram tan pawh a che tha chho zel niin a sawi.

“Hma a sawn dan hi ka hmu a ni, England tan talent ropui tak a ni. Mason Fan ruh tak ka ni bawk. Football a khelh laiin, a hmelah nui hmel hmuh tur a awm reng thin. Goal a siam thei a, a khung thei bawk, European nomawi a chawi tawh a, Kei min pha tur hian hmabak a nei tam vak tawhlo in ka hria. A fan ka nih thu ka sawi tawh a, tunkar tawpa kan inhmachhawn hunah a chet that loh ngei ka beisei.” tiin Villa boss Steven Gerrard chuan a sawi.

“Tunah chuan a khelh tam leh experience a neih belh zel dawn niin ka hria. England player tha ber pakhat a ni der tawh. Tournament hrang hrang squad ah a awm ngei ang tih hi ka ringhlel lem lo.” tiin a sawi bawk.

Source SK

Related Posts

error: Content is protected !!