Chelsea chuan nizan zanlai khan UEFA Champions League Round of 16 2nd leg match ah Borussia Dortmund chu an khelmual Stamford Bridge ah an lo mikhual a, Raheem Sterling leh Kai Havertz te chuan Blues tan goal khat ve ve khungin an team an chakpui a, last 8 ah an thawn chho.
Blues hian 1st leg match a Signal Iduna Park ah sikhat faiin tlawm mahse Stamford Bridge ah sihnih faia an chak avangin a belhkhawm (aggregate) chu 2-1 a ni a, Graham Potter leh a hote’n UEFA Champions League quarter final an khel ngei dawn e.
An game hnuhnung 12 a vawihnih chiah hnehna chang Chelsea hian team form tak Borussia Dortmund an hneh a, chutihlaiin an game hnuhnung 10 a hnehna chang fai vek Borussia Dortmund hian tun hnaia team form tak ni lem lo leh point box tih hiala mite fiam rawn Chelsea an ngam lo leh lawi si! Football a ni miau a, engpawh thleng thei a nih zia a lantir….
He match ah hian second half ah mikhual lam Borussia Dortmund chuan 65% lai mai ball chang mahse goal hmaah an hriam tawk lova, final third ah beisei an phâk loh avangin Chelsea defender te an su pawp zo lo.
Chelsea hian UEFA Champions League knockout round 1st leg a an tlawm hnua aggregate a hnehna an chan tum nga na a ni a, Barcelona, Real Madrid leh Juventus te pawhin tum nga theuh hetiang thil hi an lo thlentir tawh.
December thlaa 2-0 a Bournemouth an hneh hnu atanga chhiarin Chelsea chuan match 12 chhung zet goal hnih khung tlinna an nei lova, tunah hei match 13-na ah goal hnih Dortmund lakah an khung ve leh ta!
Dortmund hian 2013 a Emirates Stadium a 2-1 a Arsenal an hneh hnu atanga chhiarin away game a English club an hmachhawn hnuhnung 6 ah te an tlawm fai vek.
Chelsea hian an game leh ah Leicester City chu league ah an hmachhawn dawn a, nizan zanlaia chak lo Dortmund pawhin league ah Schalke an hmachhawn ve bawk ang.