Manchester United vice captain Bruno Fernandes chuan club in David De Gea an chhuahtir dan chu a fuh tawk lo niin a hria a, tun aia tha zawka thlah hi a phu in a hria.
Spanish goalkeeper kum 32 a upa hian Old Trafford a kum 12 chhung meuh a cham hnuin club a chhuahsan fel ve ta a, a chhuah dan erawh a fuh lutuk lo. Man Utd legend hian mumal taka Man Utd fans te mangtha na hun a nei lova, manager ruahmana-a a telh tawh loh vanga club chhuahsan a ni ber.
Report tarlan danin Red Devils chuan De Gea hi hlawh tlem zawk hlawh tura contract thar offer in inremna pawh a thuphungin an neih fel pui tawh nghe nghe. Amaherawhchu Red Devils hian goalkeeper thar an sign thei dawn tih an hriat hnuin De Gea hnena contract thar an lo offer tawh chu sut in hlawh tlem zawk fe an offer tha leh! Heihi De Gea chuan a duh tawh bik lova, Man Utd chhuahsan turin thutlukna a siam fel ta nge nge a ni.
Man Utd in club legend David De Gea an chhuah dan mawlh chu Bruno Fernandes an tha a ti lova, instagram lamah De Gea chu tun aia thlahna hun ropui zawk neih a phu thu a tarlang.
”I laka ka ngaihdan leh engtiang taka ngai tur che nge ka nih tih chu i hrethiam ang unaupa. Stadium a fans tam tak te’n i sulhnu ropui vanga au a thawm tha tak an chhuah kara inthlahna thu sawi hi i phu. He club ah hian history ropui tak i siam a, i hming hi engtik lai mah in theihnghilh a ni tawh ngai lovang. Chu chu he club ata tumah in an lakiang lovang” tiin Fernandes chuan instagram lamah De Gea thlahna thu thu a tarlang.
De Gea a chhuah takah chuan Red Devils in goalkeeper thar atan Inter Milan siban vengtu Andre Onana an sign dawn a, Cameroon international kum 27 a upa manah hian club pahnihte chu £50 million vel in an inrem dawn.