Zanin (February 26) dar 7:00 ah Tottenham Hotspur chuan an khelmual Tottenham Hotspur stadium ah Chelsea an lo mikhual dawn a, team lian pahnih insu tur hi a nghahhlel awm tawh hle.
Spurs hian tun season ah league game 24 an khelh atangin point 42 an hlawhchhuak tawh a, table ah 4-na ni mêk in champion tur êm a rinkai nilo mahse top 4 huanga season an khar erawh a beiseiawm thung.
Chelsea lam hian league game 23 an khelh atanga point 31 chauh la hlawhchhuakin table ah 10-na anni a, season thara Champions League khel pha turin an chak chho mawlh mawlh a tul tawh.
Conte leh a nau te hian an game hnuhnung panga ah vawi 3 hnehna an chang a, vawihnih erawh a tlawm zawk ah an tang. Graham Potter leh a nau te erawh an game hnuhnung panga ah chakni hmel an hmu lova, tum thum lai mai an khingpuite inhnehtawk pui in tum hnih an tlawm bawk! Tin, Blues hian an game hnuhnung 10 ah vawikhat chiah hnehna an chang a, tun hnaia an record hi a duhawm lo takzet!
Team pahnihte hi an inhmachhawn hnuhnung vawi 5 ah erawh Chelsea lam vawi khat tê mah an tlawm lova, vawi 4 lai mai hnehna changin tum khat draw result an nei a ni. Zanin hi Chelsea insiamthat zan a ni mahna?
Spurs lam hian hliam avangin Sessegnon, Bentancur, Bissouma leh Lloris te an chhawr thei dawn lova, Blues lam atang pawhin Pulisic, Kante, Azpilicueta, Mendy leh Broja te chuan hliam an tawh avangin Spurs an hmachhawn thei lovang.
Tottenham Predicted XI – Forster, Romero, Dier, Lenglet, Ben Davies, Hojbjerg, Skipp, Aparecido, Richarlison, Kulisevski, Kane Chelsea Predicted XI – Kepa, Chilwell, Badiashile, Silva, James, Kovacic, Fernandez, Mudryk, Felix, Madueke, Havertz