Tottenham Hotspur chuan an striker chhuanvawr Harry Kane chelhbeh tumin tan an la mêk a, contract thar mawm tak an zawrh.
Kum 29 a upa English international hian Spurs ah kum 2024 thleng bak contract a nei tawh lova, tun dinhmunah trophy a chawi theihna tur nia a hriat European club lian dang zawm a rilrûk mêk.
Kane hi Manchester United leh Real Madrid te’n an beisei ve hman uk naa a man an chhiar to lulai êm avangin an ngaihven chhunzawm duh tawh lo.
Kane lâkluh tumtu dang Bayern Munich chuan kum 29 a upa striker manah hian bid hmasa ber £60 million an offer a, nimahsela he an offer hi Spurs lam chuan an hnâwl.
Bavarians an la beidawng mai lova, bid thar theh luh leh ngei tumin an inbuatsaih mêk. Chutihrualin Kane man tura Spurs chairman Daniel Levy phut zat £100 million êm chu an theh chhuak ngam in a rinawm loh.
Club lian thenkhat nena sawizawm annih karah Spurs chuan an club tana goal khung tam ber Kane hi chelhbeh tumin theihtawp an chhuah ve mêk a, contract thar a ziah theihnan hlawh tam zawk an offer dawn bakah manager in hmaichhanah ngei inbiakna a neihpui bawk ang.
Mirror tarlan danin Tottenham chuan Kane hi kartin £3,00,000 hlawh turin contract thar an zawrh a, England captain hian kartin £2,00,000 a hlawh mêk. Tin, Spurs coach thar Ange Postecoglou chuan an striker in contract thar a ziah ngei theihnan hmin a tum dawn a, hmaichhanah ngei inbiakna neihpuiin club thil tum leh ruahmanna te a hrilhfiah ang.
Kane hi pre season training nei turin karleh lamah club ah a kir tawh mai dawn a, head coach thar nena an inbiak hnuah a hma hun a tifel thuai tura ngaih a ni. Spurs striker hian contract thar ziah a duh miau loh chuan club lam pawhin hralhchhuah an duh mahna.