Kan hriat angin Manchester United in an player hlui Cristiano Ronaldo an la lut leh ta a, mi tamtakin khawiah nge a khelh ang tiin an ngaihtuah nasa hle, mahse, United boss Ole Gunnar Solskjaer chuan C Ronaldo khelhna tur a confirm niin report in an tarlang.
Ronaldo hi Juventus lamah season 3 chhung teh meuh mai hun a hmang hman a, Seria A club lian Juventus a chhuahsan hnuah Old Trafford a pan leh a ni.
Manchester United hian an attack bikah Edinson Cavani, Mason Greenwood, Anthony Martial, Jadon Sancho leh Marcus Rashford te annei tawh a, khawiah nge C Ronaldo hi a khelh ve tak ang tih chu mi tamtak ngaihtuahna ti tamtu a ni.
Mahse, Norwegian tactician Ole chuan Ronaldo chu striker role-ah a khelh tir tur thu a sawi.
“Cristiano Ronaldo hi right, left leh front ah te a khel thei a, tunah chuan ka tan centre forward tur a ni” tiin Solskjaer chuan reporter te a hrilh niin Evening Standard in an tarlang.
“Mahse, hma tlarah emaw pathuma kan khel a nih chuan, box a awm turin ka duh a, goal khung turin amah hi ka duh a ni.”
“Englai pawhin Cristiano Ronaldo hi kan thlir reng a, engtikniah emaw chuan a chhuak ngei ang tih kan ring, heta lut turin kan duh hle.”
“Tun season-ah hian Juventus a chhuahsan ang tih kan ngaihtuah phak ngai lo, a chhuah khan amah chu kan be nghal a ni.” tiin a sawi bawk.
Source SL