Kum 2010 khan Wesley Sneijder chu khawvel player tha ber pawl a ni. Jose Mourinho’an Inter Milan chu trophy pathum lai a chawi pui a, kha tih lai khan Sneijder hi Mourinho player pawimawh tak pakhat a ni. Kum 2010 vek khan FIFA World Cup-ah Netherlands chu final an lut a, Netherlands tan goal 5 lai mai a khung bawk a ni.
Mahse, Sneijder hian Ballon d’Or erawh a dawng lo, palina dinhmun a hauh a, a chungah Lionel Messi, Andres Iniesta leh Xavi te an awm.
Mahse, Sneijder chuan Argentina star Messi leh a elpui C Ronaldo anga a that ve thu a sawi.
“Messi emaw Ronaldo ang ka ni ve thei. Mahse, hetiang lam hi ka ngaihtuah ber a ni lo.” tiin Wesley Sneijder chuan Gianluca di Marzio a hrilh.
“Life nuam tak ka hmang a, dinner-ah wine ka ina ka hlim tawk hle. Leo leh Cristiano Ronaldo hi an danglam bik, mi tamtak an hip a ni.”
“Engkim mai hi a tha vek a, ka career pawh a mak dangdai hle.”
Sneijder hian career tha tak a hman thu hi a ti sual lo. 2009/10 season-ah khan Jose Mourinho’an Inter Milan a enkawl a, Serie A nomawi, Coppa Italia leh UEFA Champions League nomawi an chawi a ni.
Hetiang hlawhtlinna a chan hnuin, South Africa a FIFA World Cup-ah khan a ram Netherlands chu Final a luh pui leh nghal. Spain that vanglai tak nen inhmachhawnin, a tlawm zawkah an tang ta a ni.
Sneijder hi club hrang hrangah a khel kual ve nasa a, Ajax, Real Madrid leh Galatasaray a khelh chhungin Eredivisie, La Liga leh Super Lig nomawi a chawi a ni. 2010 World Cup-ah khan Silver Boot leh Bronze Ball awards a dawng.
2010 Ballon d’Or dawn kha a phu viau a ni.
Source Sportbible