Manchester United in interim coach atana Ralf Rangnick an ruat hnuah Cristiano Ronaldo hmalam hun tur chungchang sawi a tam ang reng hle. A chhan pawh German tactician system leh Cristiano Ronaldo khelh dan hi a inmil lo niin sawi a awm.
Mahse, kum 63 a upa Rangnick’an United game a khelh pui hmasak ber na turah C Ronaldo erawh a tel thei dawn lo niin a lang, Ronaldo hian a khupah hliam a nei niin report in an tarlang.
The Sun in a tarlan dan chuan Cristiano Ronaldo hi amah leh amah a inti hliam niin an tarlang. Arsenal an hmachhawn tuma penalty goal a khung khan, a tih thin pangngai angin ‘Siu’ celebration hmangin a goal a lawm a, hemi tum hian hliam hi a nei niin an sawi.
Tluang takin a celebrate zova, mahse, a hnu lawkah a khup a rawn na ta niin an sawi. Arsenal an hmachhawn tum khan minute 88 naah lak chhuah a ni nghe nghe. Crystal Palace an hmachhawn hunah a tel thei dawn lo niin Marca chuan a tarlang.
Cristiano Ronaldo hi Rangnick’an a chhawr chhunzawm ang em le?
Cristiano Ronaldo chungchangah hian zawhna tam hle a, Rangnick khelh tir dan nen a inrem ang em le? Kum 6 liamtaah khan Rangnick chuan Ronaldo ang player hi a team tana khel turin a duhlo niin a sawi.
“Football idea ah chuan kan khelh dan style te a dang a, chumi mil tur player chu kan thlang thin a ni.” tiin a sawi.
“Arsenal kan hmachhawn laia second half-a Cristiano Ronaldo chet dan ka hmu, kum 36 a upa a ni tawh, professional mak dangdai tak a ni.” tiin Arsenal nen an khelh zawh hnu khan a sawi bawk.
“Amah kum angah hian amah anga physically a fit hi ka la hmu ngai lo. Awlsam taka thil thlak danglam zung zung thei player ala ni”
“Tunah chuan engtiangin nge team te hi hma kan sawn theih ang tih kan ngaihtuah a ngai a, Cristiano Ronaldo chauh ni lovin. Khawvel league harsa ber kan khel dawn a, player te hi che tha vek turin ka duhsak.”
“Cristiano Ronaldo atanga ka hmuh chu, a duh vang chauhva ti a ni lova, team tan hian a inpe hle, a teammate te pawh amah ang hi annih a ngai.” tiin Rangnick chuan C Ronaldo chungchang a sawi.
Source Marca