Real Madrid chuan Santiago Bernabeu ah nizan zanlai khan Liverpool chu sikhat faiin an hneh a, 1st leg ah 5-2 laiin an lo chak tawh bawk nen Ancelotti leh a nau te hian aggregate ah 6-2 a hnehna changin UCL last 8 an inhlangkai.
2nd leg a goal awmchhun hi Karim Benzema khung niin minute 78 naa lut a ni a, Brazilian forward Vinicius Jr assist a ni nghe nghe bawk.
Real Madrid chuan Liverpool hi a zawnin season thum chhung (2010-21, 2021-22, 2022-23) UEFA Champions League atangin an petchhuak tawh a, Klopp leh a hote’n European champion ni lai hi an khan mawlh lo!
German manager Jurgen Klopp enkawlna hnuaiah Liverpool’s hian European competition atangin vawi 6 an tla tawh a, an mahni titlatu te hi Spanish club te vek anni nghe nghe. (Sevilla-1, Atletico Madrid -1, Real Madrid -4)
Real Madrid chuan UCL last 8 vawi 19 zet an lut tawh a, anni aia lut tam zawk chu German champion Bayern Munich (21) chauh anni.
Benzema chuan Champions League inelna ah Liverpool lakah goal 7 a khung tawh a, Reds laka UCL a goal khung tam ber player a ni. Tin, English club laka UCL goal ngah ber chu Lionel Messi (27) niin pahnihna ah Karim Benzema (19) hi a awm bawk.
Inkhel dangah Napoli chuan Eintracht Frankfurt chu sithum faiin an lo sawp a, Osimhen an goal hnih a khung bakah Zielinski chuan goal khat (penalty) a thawh ve bawk.
First leg ah Napoli hian 2-0 in hnehna an lo chang tawh bawk nen aggregate ah 5-0 lai niin Luciano Spalletti hote’n phû takin Quarter final an inhlangkai.
UCL quarter final lut te hriat kim anni tawh a, heng te hi anni: Bayern Munich, Benfica, Chelsea, Inter Milan, Manchester City, AC Milan, Real Madrid, Napoli