FC Barcelona legend Gerard Pique’an 2021-22 season khelh zawh rual hian football chawlhsan a tum niin Spanish outlet El Nacional chuan a tarlang.
Gerard Pique hian kum 2004 a Manchester United a zawm hma khan Barcelona atang bul tan a ni. Man Utd lamah khan kum 4 chhung hun a hman hnuin Camp Nou lamah a kir leh a, vawiin ni thlengin Barcelona key player a ni.
Kum 34 a upa Gerard Pique hi FC Barcelona tan kum 13 liamta chhung zawng zawng kha regular starter a ni a, club tan match 585 lai a inlan tawh a ni. FC Barcelona chu La Liga nomawi 8 leh Champions League nomawi 3 a chawi pui tawh bawk.
Barcelona golden generation an tih thin Lionel Messi, Andres Iniesta, Xavi te hunlaia player atang Pique chiah hi Barcelona tana la khel awmchhun a ni tawh a. Ani pawh hi Camp Nou atang a chhuah thuai a rinawm.
Tun hnai velah Gerard Pique hi Barcelona tan a che tha em em tawh lova, mi tamtak chuan a vanglai a chuai ve tan tawh niin an ring.
Report in a tarlan dan chuan Gerard Pique hian Xavi leh a thawhpui te hnenah season tawp ruala football chawlhsan a tum thu a hrilh niin an tarlang. A hma pawhin club tan tih theih a neih vak tawh loh huna retire a tum thu alo sawi tawh a, tun hun hi football chawlhsan hun tha tak a ni ngei ang.
Tunah hian Barcelona ah kum 3 daih contract la nei mekin, Camp Nou lamah centre back tha ber a ni tawh lo tih chu a chiang hle.
Source SK