Season tluana bench luahlum tur ni mahse PSG ah Mbappe la cham a tum! – Report

Paris Saint Germain in hralhchhuah ngei duh mahse Kylian Mbappe chuan kuminah club chhuahsan tumna a nei lo thung a, a chan tur chu engpawhnise, tuar a inpeih!

PSG hotute leh Mbappe inkar a tha lo takzet a, kum 24 a upa hian contract a pawhsei loh tur thu a sawi hnuin PSG president Nasser Al Khelaifi chuan an forward hian a thlawna club a chhuahsan loh tur thu a sawi zui ve zat a, a hma hun atana thutlukna siam turin karhnih bak a neih loh thu a sawi tel bawk.

PSG lamin hralhchhuah ngei duh mahse 2022/23 Ligue 1 top scorer hian kuminah Parc des Princes chhuahsan tumna a nei lova, season tluana substitution bench luahlum tur pawh nise a tawn tur hi hmachhawn a inpeih niin RMC Sport chuan a tarlang.

Real Madrid in kuminah Mbappe hi lakluh an tum lova, nakkumah a thlawna an lakluh chuan hlawh tam tak an pe thei ang. Tin, Mbappe tan pawh Paris khawpuia season khat dang a la cham belh leh chuan loyalty bonus €60 million a dawng thei dawn a, hei hi kumina PSG a chhuahsan hreh em em chhan nia sawi a ni bawk.

Mbappe an a thlawna club chhuahsan a tum tih an hriat hnuin PSG chuan an star player hi hralhchhuah ngei an duh a, loyalty bonus €60 million phei hi chu pek an tum lo hrim hrim bawk.