Joao Cancelo chu season thara Pep Guardiola ruahmanna ah a tel lo tih Athletic chuan a tarlang a, Portuguese international hian nipui bazar inkhar hma ngei in Manchester City a chhuahsan dawn niin a lang.
Cancelo hian kumin January transfer window khan a inkhelh tam theihna tur nia a hriat Bayern Munich chu loan in thla ruk chhung atan a zawm a, Bayern lam chuan Portuguese international hi a nghetin €70 million a lalut thei ni mahse kawl zui zel an duh lova, thla ruk hnuah an chhuah fel leh nghal.
Kum 29 a upa hian Bayern Munich chu league title a chawipui a, Munich ah tha pangngai takin thla ruk chhung hun a va hmang. Hetih mêk lai hian a team dik tak zawk Manchester City chu Premier League, FA Cup leh Champions League te chawiin ropui takin an treble thung a, Etihad Stadium a chhuahsan zeuh kha a hringnuna a tihsual lian ber te zînga mi a ni ngei ang.
Bayern lama a loan contract a zawh hnuin Cancelo hi City ah a kir leh a, team training te zawm ve in pre season squad ah a tel bawk. Pep-a nau te’n an pre season game hmasa bera Yokohama an hneh tumin Cancelo hian Haaland goal khung tur tha zetin a assist nghe nghe a, amaherawhchu heng a thiltih te hian a laka Pep Guardiola rilru puthmang a thlâk dawn chuang lo niin a lang.
Inter Milan leh Juventus defender hlui hi Pep chuan season thara kawl a tum lova, a ruahmannaa a telh loh avangin kuminah City in Cancelo hi an hralhchhuak ngei in a rinawm.
Tun dinhmunah Barcelona leh Arsenal te chu Cancelo ngaihven mêk tute anni a, tun atanga ni reilote hnuah Cancelo hian club thar a zawm thuai in a rinawm bawk.