Season tawp apiangin club a player thenkhat te contract neihlai a zo thin a, thenkhat te’n an pawhsei theih laiin thenkhat te erawh chhuak duh tawh hrim hrim an awm ve bawk. Tunah chuan tun season zawh ruala a contract hmang zo tur player tha 5 te i han thlir ho teh ang:
5. Marco Reus – Hliam in a tihbuai nasat Borussia Dortmund captain Marco Reus hian tun season bak Signal Iduna Park ah contract a nei tawh lo. German winger hian 2012 khan Borussia Monchengladbach atangin Borussia Dortmund hi a zawm a, European club lian zawk te atangin sawmna dawng mahse tun thlengin Dortmund tan a la rinawm. Kum 33 a upa hian Dortmund ah kum 11 cham tawh in game pawh 300 lai a khel tling tawh a, nipui transfer bazar inhawn hunah Al Nassr in lakluh an tum dawn nia sawi a ni
4. N’Golo Kante – A hunlaia defensive midfielder tha ber pakhat N’Golo Kante hian Stamford Bridge ah season 7 chhung hun a hmang tawh a, tun hnai chho ah hliam in a tihbuai nasat avangin a inkhel tawh mang lova, Blues tana a inlan hnuhnun ber chu nikum August thla kha a ni. French midfielder hian Chelsea chu Premier League leh Champions League trophy te a chawipui tawh a, season tharah club dang a zawm hmel ta hle.
3.Luka Modric – 2018 Ballon d’Or dawngtu hian tun season bak Santiago Bernabeu ah contract a nei tawh lova, club lamin rawlthar midfielder tha tak tak an kawl bawk nen, Modric hi contract thar an zawrh tawh lo hmel. Kum 37 a upa hian Real Madrid tan UCL 5, Laliga 3 leh trophy dang tam tak a chawi a, Messi leh Ronaldo te khelh laia Ballon d’Or a dawng thei ringawt pawh hian player tha bik anih zia a tilang chiang hle. A kum lam uaithla ve deuh tawh mahse Modric hi European club lian thenkhat te’n an iai lem lo.
2. Karim Benzema – 2022 Ballon d’Or dawngtu Karim Benzema hi tun season ah hliam in a tlakbuak nasat avangin a inlan tam lo hle a, team tan goal 12 chauh a la khung. French forward hian 2009 khan Real Madrid a zawm a, Gonzalo Higuain, Alvaro Morata leh Luka Jovic te nekchhuah zawh lo a ni. Real Madrid tan UCL 5 , Laliga 3 leh trophy dang tam tak a chawi tawh a, football history a number 9 tha ber te zinga mi a ni chiang e. Kum 35 a upa hian chuai lam a pan ve ta niin a lang a, tun season tawp rualin a contract neihlai a zo ang. Real Madrid pawhin a thlaktu tur ni awm a an ngaih kum 16 a upa Endrick chu euro 60 million in Palmeiras atangin an sign.
1. Lionel Messi – Football history a Ballon d’Or vawi 7 dawng thei leh World Cup chawi hlim Lionel Messi hian tun season bak Paris ah contract a nei tawh lova, contract thar club lam in zawrh ve bawk mahse ziah tumna tun thlengin a la nei lo. Barca captain hlui hian 2021 khan free transfer in PSG hi a zawm a, season khatna ah beisei pha lo mahse tun season ah erawh Messi dik tak kan hmu. A team tan tun season ah kum 35 mi hian league goal 10 leh assist vawi 10 a thawkchhuak tawh a, league title humhim turin dinhmun tha takah PSG an ding mek.
