Manchester City manager Pep Guardiola chuan an striker Erling Haaland chu season hmasa tun ang hun aia a fit zawk thu a sawi a, an player pawimawh Kevin De Bruyne pawh a inkhelh leh thuai tur thu a sawi.
City in kumina an pre season game hmasa berah Yokohoma F.Marinos chu 5-3 in an hneh a, substitution bench atanga dah luh Erling Haaland chuan a team tan goal hnih khungin Man of the Match a thlan a ni nghe nghe bawk.
Inkhelh banah Pep Guardiola chuan Norwegian striker chungchang hi hetiang hian a sawi, “Season hmasa tun ang hun nena khaikhin chuan tuna Haaland hi a fit zawk. Season hmasa ang khan tun season ah pawh hian awm leh thei se kan duh tlang ang. A dinhmun a tha a, chutihrualin midang ang thovin a that ber dan erawh a la nilo. A pawimawh ber erawh game kalphung hriat a, chumi mila inher rem a ni. A tih tur dik tak kan hria a, tun atanga kar reilote hnuah chuan amah-a a that dan berin a awm thei tawh ang” a ti.
Kum 23 a upa Norwegian striker hian 2022/23 season khan Cityzens tan inelna hrang hranga game 53 a inlan atangin goal 52 leh assist vawi 9 a thawkchhuak a, Premier League-a a season hmasa ber ni mahse a che ropui hle. Dortmund striker hlui hian Premier League, FA Cup leh Champions League te a chawi a, a team chu a tumkhat nan UCL a chawipui bakah a treble pui bawk!
City boss chuan season hmasa UCL final-a inhliam Kevin De Bruyne chungchang pawh hetiang hian a sawi a,”Tunah chuan a dinhmun a tha tawh hle. A game khelh hun tur erawh ka hre lova, chumi hma chuan a train phawt a ngai ang. A dam fel tep a, a lo kir thuai ang” a ti.
Belgium international hi season hmasaa City player pawimawh ber te zinga mi a ni a, a team tan inelna hrang hranga game 48 a inlan atangin goal 10 leh assist vawi 31 a thawkchhuak a ni.