Season bul tan tha lo Son a mangang lo

Season bul tan tha lo mahse Tottenham Hotspur forward Son Heung Min a mangang mai lova, player tha zawk a la nih theih thu a sawi. Tun season ah Spurs in hnehloh an la tawng lova, an game hnuhnung ber chu Champions League group stage match niin Marseille lakah 2-0 in hnehna an chang.

A team ang in che tha mahse season hmasa a club leh league top scorer Son Heung Min a la parvul hleithei lova, Spurs tan game sarih a inlan atangin goal khat mah a la khung lo! Tun season ah goal la khung lo mahse South Korean international erawh in a vanduaina a kaltluang a, ngaih a awh leh thuai a ring thung.

”Heng thil te hian player tha zawk ah min chhuah thei ang. Heng thil thleng avang hian kawng tam takah a mimal emaw a team ang zawng pawh a hmasawn theih ka/kan la nih zia ka hriat phah. A pawimawh ber chu a team anga kan chet that hi a ni a, team in min mamawh anih phawt chuan engkim tih ka inhuam” tiin kum 30 a upa Son an hmasawn a la ngaih thu a sawi.

”Game thenkhat ah chuan goal khung theihna hun tha nei mah ila kan tihhlawhtlin loh chan a awm thin. Chutiang a thlen chuan nuih tawp mai loh chu tihtur dang a awm lo. Mahse ka chunga thil thleng mek ah hian ka lungkham lova, min tanpui turin team, staff leh fans te an awm” tiin a sawi chhunzawm bawk.

Tottenham hian an game leh ah Man City chu hmachhawn tur ni mahse Queen Elizabeth thihna avangin sawn hlat a ni. Season hmasa khan Spurs hian City an ngam hle a, Premier League home leh away ah te hneh ve ve in, Son hian heng match pahnih atang hian goal 1 leh assist vawi 2 a nei.

Related Posts

error: Content is protected !!