Sergej Milinkovic-Savic chuan Lazio atangin Saudi Arabian club Al Hilal a zawm dawn a, a manah Al Hilal chuan €40 million an inseng ang.
Savic transfer chungchangah Saudi lam leh Lazio te’n inremna an nei fel tawh a, kum 28 a upa hian Al Hilal ah kum 3 chhung daih tur contract a ziak anga, season khat chhungin €20 million a hlawh bawk ang.
Serbian international hian kum 8 hnuah Lazio a chhuahsan fel dawn a, Al Hilal zawm tur hian Juventus lam sawmna pawh a hnawl nghe nghe a ni. Tin, Premier League club lian pahnih Arsenal leh Chelsea te nen pawha sawizawm an lo ni tawh a, chutihrulin Premier League lam a la pan mai dawn lo.
Savic hian season hmasa khan Lazio tan inelna hrang hranga game 47 a inlan atangin goal 11 leh assist vawi 8 a thawkchhuak a, team player pawimawh ber te zinga mi a niin a vanglai tak a hmang mek kan ti thei awm e.
Saudi lama a career chhunzawm tur Savic hian Al Hilal ah Chelsea leh Napoli defender hlui Kalidou Koulibaly bakah Wolverhampton captain hlui Ruben Neves te a khelhpui ang.
Savic transfer hi a tawp na mai tur a ni dawn lova, European star Saudi lam pan tur an la kat nuk in a rinawm. Saudi lamin player hrawl leh hming lian tak tak an kawl nual a, season thar chu Middle East lam kan thlek deuh chhen a ngai tawh dawn niin a lang.