Liverpool midfielder Thiago Alcantara chuan European star dangte ang bawk in Saudi lam atangin sawmna a dawng ve a, a hma hun zel tur pawh a tifel tawh bawk.
Saudi lamin sum an ngah em em a, an huangtau sawt hle anih hi. Kumin nipui bazarah football star hming lian thekhat Karim Benzema, N’Golo Kante, Kalidou Koulibaly, Edouard Mendy, Ruben Neves leh midang thenkhat te’n Saudi Pro League lam an pan fel tawh a, kumin kumtirah Portuguese captain Cristiano Ronaldo chu Middle East lamah a lo insuan tawh bawk.
Liverpool legend leh Aston Villa manager hlui ni bawk Steven Gerrard pawhin season thar atangin SLP club Al Ettifaq head coach hna a thawk tan dawn a, player mai nilo, manager lam pawh Saudi lam hian an sign chho tan mek.
Tun hnai mai khan Saudi club te’n Liverpool a thla 12 bak contract nei tawh lo Spanish midfielder Thiago Alcantara pawh an dawr a, kum 32 a upa hian club lamin a contract neihlai an pawhsei ring lo mahse Anfield-a a contract chu hman zawh a duh a, nakkumah free agent a Merseyside club chhuahsan a rilruk nia report a ni.
Reds in an midfieder pathum Naby Keita, James Milner leh Alex Oxlade Chamberlain te an chhuah fel hnuin midfielder thar 2022 World Cup winner Alexis Mac Allister leh Hungarian rawlthar thangduang tak Dominik Szoboszlai te an sign fel tawh a, player pahnihte manah hian £95 vel an inseng nghe nghe.
Reds in an midfield lai thawmtha hneh viau mahse Spanish international tawnhriat ngah tawh Thiago hi la chhuahtir mai an tum lova, Southampton defensive midfielder beiseiawm Romeo Lavia an la beisei tel chel. Kum 19 mi Belgium interntional hi Chelsea leh Arsenal te pawhin an duh.
Thiago Alcantara an Liverpool a zawm hnuin beisei a phak lem lova, English club tan hian season thum chhunga league game 67 chauh khelin hliam in a tlakbuak nasa a, season hmasa phei kha chu Barca leh Bayern midfielder hlui hian Premier League game 18 chauh a khel a ni.