Nottingham Forest midfielder Jesse Lingard chu Saudi Arabian club te’n lakluh theih an inbeisei a, a hlawh phut zat pawh pek an inhuam niin report chuan a tarlang.
Kum 30 a upa hian nikum nipui transfer bazar lai khan Premier League a kaithar Nottingham Forest a zawm a, kumkhat daih contract ziak in kartin pound 2,00,000 a hlawh.
Forest lam chuan Lingard hi contract thar zawrh an tum lo nia sawi a ni a, nipui bazar inhawn hunah free transfer a chhuahtir a pawi ti dawn lo.
Football Insider tarlan danin Saudi Arabian club te chu Manchester United midfielder hlui Lingard lalut thei tura dinhmun tha ber te anni hlawm a, a hlawh phut ang zat pawh an tan buaina a tling dawn lo.
MLS club leh Premier League club dangte pawhin English international hi a thlawna lakluh duh viau mahse an hlawh ber hi a buaina a ni a, kartin pound 2,00,000 hlawh pek chu tuna a khelhdan nen hian a inmilh lo deuh bawk a ni.
Lingard hian season kal mek ah Forest tan league game 16 inlan tawh mahse goal leh assist a la nei lova, kumin 2023 chhung hian a team tan minute 63 chiah a la inlan bawk.
Kaihza hliam avangin January thlaah game thum a khel thei lova, a hliam te dam fel tawh mahse manager Steve Cooper ruahmannaah a tel tawh chiah lo ni pawhin a lang tan.
Forest game hnuhung 7 ah Lingard hi tum hnih chiah a inlan a, Inrinni liamtaa 3-1 a Tottenham Hotspur an hneh loh tumin first half bak luhtir a nilo bawk.