Ronaldo la cham zel tura duh tu Joel Glazer

Ronaldo an club chhuahsan duh viau mahse Manchester United co-chairman Joel Glazer erawh in a striker hi la chelbeh zel a duh. Red Devils manager Erik Ten Hag pawn Ronaldo hi hralhchhuah a duh nia ngaih ani a, amaherawhchu club neitu ber Glazer erawh in kum 37 a upa hi hralhchhuah tumna a neilo thung.

Tun season a UEFA Champions League match an khelh dawn loh avangin club ah Ronaldo a hlim lova, Portuguese international hian Champions League khel pha club a zawm theihna tur anih phawt chuan a hlawh 30% lai tihhniam a rem ti tih thlengin thuthang a awm.

Ronaldo kawppui Georgina Rodriguez pawn chhungkaw lam a ngaihtuah avangin Spain a kir leh a duh a, Ronaldo pawn chhungkaw buaina hmachhuanin pre season tour a zawm lo anih kha.

Man Utd in player transfer an kalpui dan ah Glazer hian thu a nei in thil a ti thei em em bawk. 2018 khan Anthony Martial agent chuan Martial chu club a a hlim loh thu leh Old Trafford chhuahsan a duh thu sawi chiang mahse Glazer an French international hi la kawl chhunzawm zel a duh avangin a chhuahna kawng a pin sak hmiah.

Glazer hian Man Utd inkhel a hmun ngei a a en hnuhnun ber chu 2019 April thlaa UEFA Champions League 1st leg a Barcelona an hmachhawn tum kha ni tawh mahse chief executive Richard Arnold nen nitin deuh thawh club chungchangah inbiakna an nei reng thung.

United lam chuan tun hnai deuh khan Ronaldo chu la kawl chhunzawm zel an duh thu leh zawrh lai a nih loh thu an sawi ve bawk. Hei pawh hi Glazer-a ruahmanna vek niin a lang.

Related Posts

error: Content is protected !!