Saudi Pro League inkhelah Al Wehda chuan Al Nassr an lo mikhual a, mikhual lam hian 4-0 a hnehna changin heng goal 4 te hi Cristiano Ronaldo khung vek a ni!
Portuguese striker hian minute 21 na ah Al Nassr hmahruaina goal a khung a, a career a club goal 500 a khung tlinna chiah ni bawk in mellung pawimawh tak a phun.
Goal khat chauh ah Ronaldo a duhtawk mai lova, minute 40, 53(Penalty) leh 61-na ah te goal thum dang khung leh in a career ah hattrick (club & country) vawi 61 lai a siam tling ta bawk.
Kum 38 a upa hian a club thar tan game 4 a inlan atangin goal 5 a khung tawh a, nizan khan point 3 hlu tak Al Nassr in a hlawhchhuak. Saudi lamah Ronaldo a sui leh mawlh mawlh tawh.
Portuguese superstar hian a career a league goal a khung dan chu hetiang hi a ni; Real Madrid tan goal 311, Manchester United tan goal 103, Juventus tan goal 81, Sporting CP tan goal 3 leh Al Nassr tan goal 5 te a ni. A vaiin career goal 503 a nei tawh tihna anih chu!
Ronaldo khelhna Al Nassr hian tun season ah league game 16 an khelh atangin point 37 an hlawhchhuak tawh a, table chung ber an luah mêk. An game leh ah Al-Taawoun an hmachhawn ang.
