Cristiano Ronaldo an tumkhat player pahnihte chu phone call hmang ngei a bia in Manchester United zawm turin a hrilh a, player pahnihte pawhin khatih hunlaia Premier League club lian dang anmahni duh ve tu Arsenal hnawlin United an thlang.
Ballon d’Or 5 kawltu hian Sir Alex Ferguson hnuaia a khelh tumin Brazilian phir unau Rafael Silva leh Fabio Silva te chu Man Utd zawm turin a lo hmin tawh a ni.
Rafael an United podcast kaltlanga CR& atanga phone call a dawn thu leh chu chuan United zawm tura thutlukna a siam ah nghawng lian tak a neih thu a sawi.
”Phone call in min rawn bia a, ka theihnghilh ngai tawh lovang. Tumkhat ka phone call dawn kan en chuan international call a ni tih ka hre thei a, hetiang phone call hi ka la dawn ngai meuh loh avangin mak pawh ka ti angreng hle. Phone call chu la in, ‘Tunge i nih aw?’ tiin ka chhang a, chutah a lo tawngchhuah chiah chuan amah (Ronaldo) a ni tih ka hria a, a chhan pawh ka lo train pui tawh vang a ni.”
”Ani chuan Portuguese tawng hian chibai mi rawn buk a, chutah kei chu bus lamah tlan phei nghalin, ‘Ronaldo a ni, Ronaldo a nih hi’ tiin ka va sâhawk chiam a. Ani chuan, ‘Ka hrilh duh che u chu, Man Utd tan hian sign rawh u. In duh viau dawn ania’ a rawn ti a. A lak atanga phone call dawn kha a mak hle a, ka awih theilo hial zawk’ tiin Rafael chuan a sawichhuak.
Rafael phir pui Fabio pawhin 2020 khan Rafael sawi ang deuh hian a lo sawi tawh nghe nghe a, Ronaldo an Man Utd ah tawng lama a tanpui dan thin te, mahni inrintawkna nei tura a fuih sauh sauh dan thin te a lo sawi tawh bawk.
Gary Neville an inkhelh a chawlhsan hnuin Rafael hi Man Utd right back rinrawl a ni chho va, Man Utd tana hun a hman chhung hian Premier League title 3 a chawi hman. Louis van Gaal hnuaia hmun a chan theihloh hnuin 2015 khan Lyon lam a pan a ni.
Hetih mek lai hian Rafael phir pui Fabio erawh 2010-11 season khan Premier League medal a dawng a, QPR ah te loan-a a kal kual hnuin 2014 khan Cardiff City lama hralhchhuah a ni.
