Cristiano Ronaldo chuan tuna a khelh mêk na Al Nassr zawm ve turin Porto star Otavio a sawm niin report chuan a tarlang.
Porto midfielder Otavio hi tun hnaiah Al Nassr nena sawizawm an hlawh viau a, kum 28 a upa hian Portuguese club tan season hnih dang contract la nei mêk mahse Al Nassr chuan sum tam tak hlawh turin an sawm mêk nia sawi a ni.
A Bola chuan kum 38 a upa Cristiano Ronaldo an Otavio chu Al Nassr lamah amah rawn zawm ve turin a sawm tih a tarlang. Al Nassr pawhin Otavio hi kum 5 chhung daih tur contract ziahpuia season khat ah £12 million hlawh pêk an inhuam a, heihi tuna a hlawh mêk let 5 lawih a tam a ni nghe nghe.
Otavio hian release clause £31 million a nei a, amaherawhchu he a release clause hi tun thla July ni 15 thleng chauha nung tur a ni. July ni 15 hnulamah chuan a release clause hi £47 million ah a kaichho tawh dawn.
Otavio leh Ronaldo te’n inkungkaihna tha tak an nei a, ram aiawhin an lo fehchhuak dun fo bawk. Ronaldo meuh in a sawm tak tak chuan Otavio hian Middle East lam a pan lo ang tih a sawi theihloh.
