Loan a Chelsea zawmtu Joao Felix chuan Cristiano Ronaldo an Europe ah engkim a hlen tawh thu leh Al Nassr a zawm chu mak a tih loh thu a sawi.
Manchester United nen an inthathen hnuin Cristiano Ronaldo an kumin kumtir khan Al Nassr a zawm a, kum hnih leh a chanve chhung daih tur contract ziak in kumkhatah £175 million a hlawh ang.
Portuguese striker hian Al Nassr a zawm tirin mi tam tak mak tih a hlawh a, Europe inelna a tel tur chuan a tha tawk tawh lo niin a ngai.
Portuguese forward kum 23 mi Joao Felix erawh in Ronaldo an Saudi lam a pan chu mak a tih lo thu hetiang hian a sawi, “Europe ah eng dang mah han hlawhchhuah leh tur a nei tawh chuang lova, chuvangin Saudi lam a pan kha keichuan mak ka ti lem lo.”
“Football history ah ropui takin a hming a chuang tawh a, tunah chuan Saudi Arabia football history lehkhabu ah a hming a ziak tan leh tawh. Duhsakna zawng zawng ka hlan e” a ti.
Ronaldo hian Al Nassr a zawm hnuin a game li na ah hattrick a siam a, a career a hattrick a siam vawi 61 na niin ani aia hattrick siam hnem football player zingah an awm lo. Club goal 503 khung tawh tu hian Al Nassr chu point 37 nen Saudi Pro League table chung ber a luahpui mêk a, champion turin dinhmun tha ah an awm.
Kum 38 a upa hian a career ah title 34 lai mai a chawi tawh a, chung zingah chuan UEFA Champions League 5, League title 7, Club World Cup 4 leh UEFA super Cup 3 te a tel. Mimal chawimawina lam pawh kum 38 a upa hian a la hnem fu a, Ballon d’Or 5, FIFA World player of the year vawi 3, UEFA best player in Europe 3 leh a dang tam tak te a tel.