Cristiano Ronaldo teammate hlui pakhat chuan Ronaldo aia Lionel Messi a thlan zawk thu leh a thlan chhan te a sawifiah.
Manchester United academy chhuak leh Red Devils tana game 81 lo khel tawh Kieran Richardson chuan Lionel Messi chu khawvela footballer ropui ber ah a ngai.
Richardson leh Ronaldo te hi Man Utd tan game 40 an kheldun hman a, Sir Alex Ferguson enkawlna hnuaia hlawhtlinna ropui an chan hnuin 2009 khan Old Trafford an chhuahsan a ni.
Ronaldo hian a career ah trophy 32 leh Ballon d’Or vawi 5 lai dawng in mi tam tak chuan footballer ropui ber hialah chhal mahse Richardson erawh in a teammate hlui aiin Lionel Messi a dah chungnung zawk thung.
“An pahnih hian GOATs anni a, amaherawhchu Ronaldo hi hrechiang in lo khelhpui tawh mah ila pakhat thlang tura min ti anih chuan Messi ka thlang ang” tiin Richardson chuan Steven Sulley Podcast kaltlangin a sawichhuak.
Richardson chuan sawi chhunzawmin, “World Cup hi thil ropui tak a ni a, Messi an World Cup a chawi hma khan, ‘World Cup a la chawi lova, a tha ber huanga awm Maradona leh Pele te a la tluk lo’ tiin mite chuan an sawi thin. Tunah erawh chutiang thu chu an sawi thei tawh lova, footballer zawng zawng te awh em em mai trophy a chawi tawh.”
“Mimal chawimawina ropui tak tak dawng tawh mahse footballer kan nih anga kan naupan tet atanga tu te pawhin kan awh em em mai World Cup a chawi tawh a, a thil duh ber pawh a ni ang” a ti.
Lionel Messi hian tun season ah Paris Saint Germain tan game 30 a inlan atangin goal 17 leh assist vawi 17 a thawkchhuak tawh a, kum 35 a upa ni tawh mahse team tan a la tangkai hle. Hetih mêk lai hian January thlaa Saudi Arabia lam pantu Cristiano Ronaldo pawhin a club thar Al Nassr tan game 8 a inlan atangin goal 8 leh assist vawi 2 a thawkchhuak tawh a, kum 38 a upa ni tawh mahse goal khung bansan zai a rel thei lo.