Al Nassr midfielder Luis Gustavo chuan team ah Cristiano Ronaldo a tel in match khelh a harsat zual sawt thu a sawi.
A tum khat nan Ballon d’Or vawi 5 dawng tawh Cristiano Ronaldo chuan Europe khawmualpui chhuahsan in Saudi Arabia lam a pan. Al Nassr chu free transfer in a zawm a, kum khata £173 million hlawh tura contract sign in infiammi zînga sum lalut hnem ber a ni mêk.
Portuguese striker hian Al Nassr a zawm hnuin fans te phur viau mahse duh ang in bul a tan tha lova, competitive match 3 a khelhna ah goal khat a khung ve hrâm. February ni 3 a Al Fateh nen 2-2 a an inhnehtawk tumin kum 38 tling hlim Ronaldo hian penalty spot atangin a team goal hnihna a khung a, point 1 an hlawhchhuak.
Al Fateh nen 2-2 a an inhnehtawk hnuin Gustavo chuan an team a Ronaldo a tel ve avanga game khelh a harsat thu hetiang hian a sawi,” Anih na takah chuan Ronaldo a tel hian game khelh a harsa zual sawt a, a chhan chu a lakah hian team zawng zawng in theihtawp chhuaha khelhthat an tum vang a ni. Mi zawng zawng a chawkphur a ni ber” a ti.
Gustavo chuan an team a Ronaldo tel in hetiang a Al Nassr player dangte a pui thu sawi leh in,”Al Nassr a tel ve avang hian player dangte’n hlawkna tam tak kan chhar a, a chhan chu nitin mai in an hnen atanga thil thar kan zir vang a ni. A theihna neih dan zawng zawng te, taksa leh rilru lam thleng pawh in.”
“Cristiano Ronaldo hi chona thar hmachhawn tura duan a ni a, a tihlawhtling zel bawk. Mi zawng zawng hian he hmunah enge a rawn thlen dawn tih an nghak mêk a, a goal hmasa ber a khung tawh bawk nen, a laka pressure awm te paih bo a ni tawh” a ti.
