Manchester United midfielder Scott McTominay chu AS Roma bakah Brighton & Hove Albion te’n an ngaihven mek niin report chuan a tarlang.
Scottish international hi Dutch manager Erik Ten Hag hnuaiah a inlan tam lova, midfield ah Christian Eriksen leh Casemiro te chu rinrawl ber anni.
Ten Hag hnuaia tlatlum lo McTominay hi Brighton boss De Zerbi chuan lakluh a duh a, AS Roma manager Jose Mourinho pawhin a lo enkawl tawh midfielder hi Serie-A lama hruailuh a duh niin CBS Sports chuan a tarlang.
Kum 26 a upa hian Serie-A lam a pan chuan a pu hlui Jose Mourinho hnuaiah a inkhel leh thei dawn a, 2016-17 season khan McTominay hi Mounrinho enkawlna hnuaih Red Devils tan a debut match a khel nghe nghe.
Hetih mek lai hian De Zerbi hnuaia team hmuhnawm Seagulls chuan Man Utd academy chhuak hi sign an duh a, an midfielder chhuak tura ngaih Moses Caicedo thlaktu tura an duh a ni. Kum 21 a upa Ecuadorian international hi Chelsea in lakluh an tum mek a, an midfielder beiseiawm tak manah hian Brighton chuan £80 million an phut nia sawi a ni bawk.
Scott McTominay hian season hmasa khan Red Devils tan inelna hrang hrangah game 39 inlan mahse inkhelh bul tanna match 16 chauh a nei a, Premier League match 10 ah chauh inkhelh bul a tan bawk.
Scottish international hian Old Trafford ah 2025 June thla thleng contract la nei in a hlut zawng pawh £25 million vel tura ngaih a ni. Kumin nipui bazar hian a inkhelh tam theihna tura a ngaih club dang zawm a duh tawhna mahna.
McTominay bakah Man Utd midfielder dang Fred chu AS Roma nena sawizawm anni bawk a, kum 30 a upa Brazilian international hi Premier League club Fulham pawhin an iai lo. Fred hian Old Trafford ah thla 12 chiah contract a nei tawh a, club lam chuan contract thar ziahpui tumna an neih loh avangin Shakhtar Donetsk midfielder hlui hi kumin nipui bazara Old Trafford chhuahsan thut thei reng a ni.