July thla khan Saudi Arabian club chuan Brazilian striker Roberto Firmino chu kum 3 chhung atan an la lut a, kum khatah £17 million vel hlawh turin an inrem a ni.
Kum 32 a upa Firmino chuan August thla khan Al Ahli tan a game hmasa ber khelin, Al Hazm lakah hat-trick a siam nghal anih kha.
Game hmasa ber a khelhah a chet that em avangin, Pro League player che tha ber tura ngaih anih laiin duh ang leh beisei angin a che tha chhunzawm lo hle.
Robert Firmino hian a game hmasa ber a khelh naah hattrick siam nghal mahse, game hmasa ber a khelh hnu lamah goal a khung leh tawh lo a ni.
Goal khung lamah beisei ang ni lo mahse, Al Ahli lam erawhin season bul an tan tha viau a, tun dinhmunah 4 na dinhmun hauh mek in, game 12 an khelh atangin vawi 3 chiah an la tlawm rih.
Game 10 atanga goal han khung lo tawp mai chu striker tan chuan thil duhawmlo tak pakhat a ni. Al Ahly lama a teammate Riyad Mahrez leh Allan Saint-Maximin erawh an che tha viau mai.
Goal khung lamah harsatna a tawh vang pawh a ni mahna, kar hmasa lama Al Riyadh an hmachhawn tumin, starting lineup ah telh a ni lo.
January transfer window lo awm turah hian hralh chhuah tur zingah an dah der tawh niin an sawi a, mahse, Saudi club lam erawh an la beidawng duh bik lo, Firmino hi huntha an la pek belh ngei a rinawm,
Kum 3 chhung teh meuh mai club lama la awm rih tur chuan goal khung lamah tan a lak deuh hlek a ngai rih dawn a ni.
Firmino hian Reds tan all competition ah match 362 inlanin goal 111 a khung mai bakah assist 79 a nei tling ve hman a ni.