Arsenal in Declan Rice transfer an tihfel theih lawk loh avangin West Ham United lam an lungawi lova, dawhtheihna an tlachham tan hle nia report a ni.
Sky Sports tarlan danin Declan Rice transfer tihfel nana Arsenal lamin lehkha pawimawh an rawn tichhuak har lutuk chu West Ham hotute ngaihdan a ni lova, Gunners lam chu muangchang lo turin an duh.
Kum 24 a upa Rice manah Arsenal leh West Ham te chu karkhat liamta khan £105 million in inremna an lo nei fel tawh a, an inremna rei thawkhat tawh mahse tun thlengin erawh English international transfer hi official a la puan a nilo.
Tun thlenga Rice transfer la tihfel loh chhan hi Arsenal lawyer te’n contract lehkha pawimawh an la tihchhuah theih loh vang a ni a, karkhat aia rei West Ham lamin an nghah a ngai hi an ning ve hle niin a lang. Hammers lam hian Rice transfer tihfel nana lehkha pawimawh ah signature pek thuai an duh a, chumi hnuah an captain aiawh tur midfielder lakluh tuma hma lak tan an duh tawh a ni.
Rice hian Arsenal ah medical test a nei fel tawh a, tunah hian Portugal ah chawlh hmang mek in tun hnai mai khan Portuguese star pathum Bruno Fernandes, Joao Cancelo leh Rafael Leao te nena an train ho lai hmuh a ni nghe nghe.
Engpawhnise British player man to ber tur Rice hian Arsenal a zawm fel thuai dawn a, Gunners in pre season tour nei tura United States lam an pan hunah £105 million man midfielder hian a thiante a zawm hman ngei a rinawm bawk.