Arsenal in club record fee £105 million meuha an lâkluh Declan Rice chu a team thar Arsenal ah hruaitu anih a ngaih thu Wayne Rooney chuan a sawi.
Gunners in an pre season game hnuhnung bera MLS All Stars 5-0 zeta an sawp tumin Rice hi minute 65 naa dah luh a ni a, a team thar tana a game khelh hmasak ber tum ani nghe nghe.
DC United boss Rooney chu Rice khelhdan in a mit a titlung hle a, British player man to ber hi Gunners tana player pawimawh anih a beisei.
Wayne Rooney chuan,”Ka ngaihdan chuan Arsenal team ah hian hruaitu anih a ngai. Frank Lampard lo sawi tawh ang khan Rice hian Chelsea zawm se tun atanga kum 10 chhung chu captain va ni thei tur a ni. Chutiang chiah chu Arsenal ah hian a thlentir thei ang. Mize paukhauh tak a neiin ka hria a, Arsenal tan hian player hrawl tak a ni ngei ang” a ti.
Arsenal manager hlui Arsene Wenger pawhin man to taka Rice an lâkluh hnuin Arsenal chuan Premier League title an chawi tawh ngei a beisei thu a lo sawi hial.
Gunners hian Rice bakah Kai Havertz leh Jurrien Timber te chu tlawm lo takin an lalut bawk a, squad tha tak an lo nei sa tawh nen, season tharah Mikel Arteta nau te hi league title chawi thei tur zinga mi an nih ngei a rinawm.
Arsenal hian an pre season game leh ah Manchester United, Barcelona leh Monaco te an la hmachhawn dawn a, Premier League tan hma deuh in champion lai Manchester City nen Community Shield chu August ni 6 khian an inchuh bawk ang.
