Tun summer transfer window chhungin Liverpool chuan West Ham midfielder Declan Rice chu lak luh an tum dawn niin report in a tarlang. Declan Rice hian duhtu a ngah hle a, tun hnai lawk atangin Liverpool pawh amah duhtu zingah an tel thar ve a ni.
Eurosport in a tarlan dan chuan Liverpool in Declan Rice hi Georginio Wijnaldum thlaktu tur atan lak luh an duh niin an tarlang. WIjnaldum’an Liverpool lama contract a neih a zawh avangin club a chhuahsan a nih kha.
Liverpool target-ah hian Florian Neuhaus leh Renato Sanches hi tel mahse, an top target chu Declan Rice a nih thu an sawi.
Declan Rice hi Euro 2020, England player che tha ber pakhat ani mek a. Naktukzan zanlaiah Denmark nen semi final an khel ang.
England hi 2020 Euro Champion tura rinkai ber pakhat anni mek a, round of 16 leh quarter final-ah an che tha hle.
Declan Rice hi ram tan mai ni lovin club tan pawh a che tha a, Premiere League player atanga mite duhrawn ber pakhat ani mek. West Ham tan kum tlemte liamta atang khan a che tha hle a ni.
Rice hian West Ham united chu Premiere League-ah 6 na dinhmun a hauh pui a, Season tharah Europa League an khel thei dawn a ni. Tunah hian kum 22 chauhva upa la ni rihin hmalam hun eng tak a nei mek. Chelsea nen pawh transfer hmasa zawk atang khan sawi zawm anlo ni ve tawh bawk
Liverpool hian an la lut thei mai lovang maw?