Manchester United manager Erik Ten Hag chuan Casemiro red card hmuhna chu awm ti viau mahse match referee in amah chuah a pek bik thu a sawichhuak.
Nizan Premier League inkhelah Manchester United chuan 2-1 in Crystal Palace an hneh hram a, point 3 hlu tak an hlawhchhuak. Minute 70 na ah Antony tihtluk anih atanga buaina kal zel ah Casemiro chuan Hughes a rek a, VAR hmanga a chet dan enchian anih hnuin match referee Andre Marriner chuan Brazilian midfielder hi red card a pe.
Inkhelh banah Red Devils boss Ten Hag chuan Casemiro red card hmuh chungchanga a ngaihdan hetiang hian a sawichhuak,”Hnehna kan chan avangin kan lawm em em a, chutihrual chuan Casemiro hnawhchhuah anih danah erawh kan lung a dam lo thung. Dik tak chuan kha buaina ah khan player tam tak an inrawlh a, Palace player pawhin Antony hliam tum in a che rothap hle a, kar hmasa lamah Christian Eriksen pawhin hliam a lo tawk tawh anih kha”.
“Team kan nih ang in kan tana player pawimawh tak kan chhawr thei rih dawn lova, kan inpumkhat leh zual a ngai. Team ah inlungrualna leh tumna in hmu thei ang a, chutihruallin player te’n an ram lo chin an dai erawh thil dik a nilo. Player te tih awm a mawilo a awm a, chuvangin Casemiro hnawhchhuah anih kha kan pawm mai a ngai a, a tel lova kan insiamrem a tul” a ti.
Crystal Palace laka hnawhchhuah tawk Casemiro hian United game khelh leh tur 3 (ramchhung inelna) te a hmaih dawn a, Eriksen a inhliam leh zel bawk nen, loan a an lakluh Marcel Sabitzer paiwmawhna a zual khawp ang le.
Premier League game 21 atanga point 42 hmu tawh Ten Hag leh a nau te hi league table ah 3-na anni mek a, an game leh ah Leeds United an hmachhawn ang.
