Merseyside derby match ah Liverpool chuan Anfield ah Everton an lo mikhual a, mual neitu lam hian Mohamed Salah leh Cody Gakpo te goal hmanga hnehna changin point 3 hlu tak an hlawhchhuak.
Klopp leh a pawlte hian 2023 league game a hnehna an chan hmasak ber tum nizan khan an tawng a, £45 million a PSV Eindhoven atanga Liverpool zawmtu Dutch forward Gakpo pawhin match sarih a inlan hnuah a club thar tana a goal hmasa ber a khung.
Liverpool tan top 4 beiseina a la nung reng a, league game 21 an khelh atanga point 32 hmu tawhin table ah 9-na anni mêk. Season thara Champions League khelh an duh anih chuan season chawhnu lama an chak chho mawlh mawlh a ngai dawn.
Liverpool hian table a 4-na a awm Newcastle United chu point 9 in an phâk lo mêk a, an league game leh ah Magpies an hmachhawn dawn a, St James Park a hnehna an chang thei anih chuan point 6 bak in team pahnihte an inthlau tawh lovang.
Nizana goal khat khungtu Salah chuan Anfield ah league game 104 a khel tling chiah a, goal 71 leh assist vawi 29 (100 goals contribution) a nei thei a ni.
Tin, German coach Jurgen Klopp pawhin nizan khan Reds manager anga match 250 (all competition) a chakna a ni a, game 414 mamawh bawk in Reds manager zînga match 250 chak tura match mamawh tam lo ber a ni nghe nghe.
Kum 18 a upa Stefan Bajcetic chu Premier League Merseyside derby history a match start thei naupang lam pathumna a ni a, Michael Owen leh Raheem Sterling te chu he derby a Bajcetic aia inlan thei naupang zawk te anni.
Reds hian league game hnuhnung 4 a chakni hmel an hmuhloh hnuin nizan khan an chak ve leh ta chiah a, team ah pawh phurna leh thathona a thlen ngei ang. An game leh ah team tlo Magpies an hmachhawn dawn a, inkhel hmuhnawm tak an chhawpchhuah ngei a rinawm.