Real Madrid chuan Bayern Munich defender David Alaba chu tun summer-ah free transfer in an la lut a, mi tamtak chuan la lut fuh an ti viau niin a lang. Mahse, hmun dang atanga news thar rawn chhuak leh chuan mi tamtak a ti lawm vak lo niin report in an tarlang.
German magazine pakhat Der Spiegel chuan Rafa Honigstein kal tlangin Austrian international Alaba’an Real Madrid lama a hlawh chu an ti leak out tlat mai. Real Madrid hian David Alaba hi kum 5 chhung daih atan an la lut a, hemi hun chhung hian €115 million lai mai an pe dawn niin an tarlang.
David Alaba hian Santiago Bernabeu-ah hian kum tin €25 million hlawh ziah ang a ni dawn a, kar khata a hlawh tur chu £376,000 lai a tling tihna a nih chu. Real Madrid hian agency fee an pe niin an sawi bawk, agency fee atan hian €11.5 million lai an pe niin an tarlang.
An sawi zel danah chuan Bayern Munich lam hian David Alaba hi contract pawhsei sak an tum ve reng a, kum khata a hlawh tur hi €16.5 million an offer a ni. Mahse, Real Madrid lam chuan Bayern Munich offer let 2 tep an lo offer daih mai.
He chanchin hi hi Real Madrid fans ten an hriat meuh chuan a barakhaih hle. A chhan chu club lamin sum lamah harsatna an tawh lai tak a ni bawk nen, tuna Alaba an lak luhna hian player tha dang pawh an la lut thei dawn niin an ngai hlawm.
Kan hriat angin Covid 19 vangin club hrang hrang ten sum lamah harsatna an tawk nasa a, Real Madrid pawh an bang bik chuang lo. Hetihlaiin player dang an lak luh theihna turin an player tha neihsa thenkhatte an chhuah tir bawk.
Real Madrid hian Brahim Diaz chu AC Milan lamah loan in an chhuah tir a, Sergio Ramos pawh Paris Saint-Germain lamin an la lut bawk. Raphael Varane pawh Manchester United in £41 million vel in an la lut a nih kha.
Player dang chhuak tur pawh an awm rih maithei, hetihlai hian player tha dang pawh lak luh an tum ve mek zel niin an sawi.
Source SL