Copa del Rey semfinal 1st leg ah Barcelona in sikhat faiin mual neitu Real Madrid hneh mahse a nau te khelhdan ah manager Xavi a lungawi lo hle a, an khingpui Real Madrid chu anni (Barca) aia final lut turin a la ring fan.
Nizan El Clasico match ah Real defender Eder Militao chuan first half minute 26 na ah own goal a nei a, hei bak goal dang luh belh tawh lovin 2nd leg ah Barca in goal khat nei sa in Real Madrid an lo mikhual ang. 2nd leg match hi April ni 6 zinglam dar 1:30 ah Camp Nou a khelh a ni dawn a, he game a match result hian final lut tur zawk a tichiang ang.
Madrid chu a tlawm zawk ni mahse Barca lakah ball an chang tam em em a, shot pawh vawi 13 lai neiin goal zawna kal erawh a awm lo thung. Xavi chuan a nau te khelhdan tha a tilo hle a, hnehna chang mahse a lawm a kim lo.
”Advantage chu ka nei ngei a lawm, amaherawhchu he kan inbeihna a chak zawk turin 2nd leg a kan khelhthat viau a ngai dawn. Kan inveng tha em em a, kan khelmual Camp Nou ah fans te nena kan khingpui kan lo mikhual tur pawh hi thil tha tak a ni. Amaherawhchu Real Madrid hi tlang tur zawk ah keichuan ka la ngai” tiin inkhelh banah Xavi chuan thu a thlah.
Barca boss chuan sawi chhunzawmin,”Kan result hlawhchhuah kha a tha lam a ni a, ka inveng tha in kan defense pawh a khawng narawh e. An khelmualah ngei Real Madrid khan an duh ang an thlentir thei lova, game harsa tak a ni. Hnehna kan chang thei hi a ropui hle a, chutihrualin ball kawl rei dan kan theihnghilh a, mi pahnih ball inchuhna (duels) ah a duap zawk kan ni fo. Kan fans te pawhin min thlawp tha hle a, a lawmawm ka ti, mahse ball chan tam kawngah hma kan sawn leh zual a pawimawh. Kan khingpuite hi game kan thunun tir tur a nilo” a ti.
Xavi nau te hian Real Madrid lakah 35% ball possession chauh an nei a, hnehna chang mahse an khelhdan ah an pu ber a lungawi lo tih a hriat. Point 59 nena league table chung ber luah mek tu Barcelona hian an game leh ah Valencia chu league ah an hmachhawn ang.
