”Real Madrid aiin kan tha zawk, mimal leh team ang pawhin” – Laporta

Barcelona president Joan Laporta chuan an elpui leh hmelma club ni bawk Real Madrid aiin an that zawk thu a sawi a, mimal leh pawl (team) ang zawng pawhin an chungnung zawk niin a ngai.

Blaugrana hian season hmasa khan league title an chawi a, an hmelma Real Madrid nena vawi 5 an inhmachhawn atangin vawi 3 a chak zawk ah an tang.

Sport in an kawmna ah Laporta chuan Real lam aia an that zawk thu hetiang hian a sawi, “Real Madrid aiin team kan nei tha zawk a, a mimal ang zawng pawha kan that zawk bakah kan inkar a zau hle. He club zinga mi leh tantu ka nih ang in team kan din mêk ah hian ka lungawi hliah hliah. Team tawhkhirh tak kan nei sa tawh. Spanish league (league) kan chawi tawh a, season tharah pawh league thunun leh turin tan kan la leh ang” a ti.

Barca president chuan sawi chhunzawmin, “Player malkhai tha tak lâkluh aia ka ngaih pawimawh chu team tha tak din a ni. Ilkay Gundogan leh Inigo Martinez te kan lalut tawh a, he team tan hian tha takin an khel dawn. Tin, player dang lo lut leh zel tur te pawh an rawn che tha ang.”

Barca hian Brazilian rawlthar Vitor Roque an lalut fel tawh a, amaherawhchu kum 18 a upa hian nakkum atang chauh in Barca a zawm thei ang.

Barca ang tho in Real Madrid lam pawhin an squad an thawmtha mêk a, Los Blancos hian heng player: Jude Bellingham, Arda Guler, Brahim Diaz, Joselu Mato leh Fran Garcia te lâkluh nan €130 million chuang an insêng tawh a ni.

error: Content is protected !!