Real Madrid-ah kum 16 chhung teh meuh mai hun a hman hnuin, Sergio Ramos chuan Los Blancos a chhuahsan tak tak tawh dawn niin club lam chuan nimin khan an confirm.
Real Madrid in press conference-ah a chhuah tur thu an puang a, thlahna ang reng te pawh an siam niin goal chuan a tarlang.
Kum 35 a upa Sergio Ramos hian Santiago Bernabeu-ah hlawhtlinna tamtak a chang a, a chhuak tak tak a nih chuan trophy tam tak a hnutchhiah dawn tihna a ni. Kum 2005 khan Sevilla atangin Real Madrid a zawm a, club tan game 670 lai khel tlingin, La Liga nomawi vawi 5 lai a chawi a, hei mai bakah UEFA Champions League vawi 4 a chawi bawk.
Mahse, tunah hian Ramos’an Real Madrid ala chhuahsan tak tak lova, Manchester United leh Paris Saint Germain te nena sawi zawm mek a ni. Hetihlai hian La Liga lamah pawh a la awmchhunzawm mai thei, a chawrchhuahna club Sevilla lamin kum 5 chhung daih tur contract an zawrh a ni.
Real Madrid lama Sergio Ramos hun a tawp dawn tawh avangin, Real Madrid kawr ha chunga a chet ropuina 5 te kan rawn thailang ve leh e.
1. 2014 UEFA Champions League final-ah goal pawimawh tak a khung
2014 UEFA Champions League final-ah khan Real Madrid chuan an elpui ber pakhat Atletico Madrid an hmachhawn a, huntawp dawn (injury time) thleng khan Atletico Madrid lamin 1-0 in hma an hruai.
Huntawp lamah Real Madrid chuan corner an hlawhchhuak hlauh mai, Luka Modric chuan corner petin, Sergio Ramos hian a lu hmangin goal-ah a ti lut a, 1-1 in an draw thei hram. Ramos’an goal a khung lai hian minute 92 leh second 48 a ni. Extra time a pel tawh tihna a nih chu.
Extra time khelh a ni a, Los Blancos lamin 4-1 in hnehna an chang a, Champions League nomawi vawi 10 na an chawi.
2. 2014 UEFA Champions League semi final
Real Madrid in final an luh hma khan semi final ah defending champion Bayern Munich an hmachhawn, kha tih lai khan Real Madrid hmachhawn ho kha an tha thei hle.
Allianz Arena-ah Real Madrid chuan Bayern Munich chu 4-0 lai maiin an hneh a, second leg ah pawh 1-0 thovin hnehna an chang leh. Real Madrid in aggregate 5-0 in hnehna an chang. Kha tih laiah khan Sergio Ramos chuan goal 2 a khung ve a ni.
3. A zawna UEFA Champions League nomawi vawi 3 chawi thei Captain hmasa ber
2018 UEFA Champions League final Kyiv a khelh kha Sergio Ramos tan a vawi 3 chawina a ni. Kum 2017 khan captain zingah Champions League nomawi a zawna vawi 2 chawi thei hmasa ber alo ni tawh.
Kum 2018 ah a vawi 3na atan a chawi leh a ni. Kum 2018 ah khan Liverpool nen final khelin, 3-1 in hnehna an chang a, Real Madrid tan Gareth Bale leh Karim Benzema’an goal an khung a ni.
4. Mohamed Salah chungah thil duhawmlo tak a ti
Kan hriat angin Real Madrid leh Liverpool in 2018 UEFA Champions League final an khelh tumah khan Sergio Ramos chuan Liverpool thiampuipa Mohamed Salah chu a banah kuaiin a tluk pui a, Salah hian a dar/koki velah hliam a nei a nih kha.
Ramos’an a pawhtluk avang khan hliam a tuar a, field a chhuahsan ngei ngei a ngaih phah, mittui tla chungin field a chhuahsan a, hunrei tak a awh a nih kha. A inhliam avangin a ram Egypt tan FIFA World Cup group stage Uruguay nena an khelh turah pawh a khelh theih loh phah a ni.
Real Madrid chuan 3-1 in an hneh a, Mohamed Salah kha chhuak lo se chuan game a danglam ngei ang. Real Madrid hi an champion kher lo maithei titu pawh an tam.
Sergio Ramos vangin Real Madrid an champion a tih theih maithei.
5. 2016 UEFA Super Cup vs Sevilla
Sergio Ramos hi Real Madrid tan game lian emaw game harsa-ah hian a lang thei ziah. Kum 2016 khan UEFA Super Cup final ah a naupan laia a club Sevilla an hmachhawn a. Real Madid lamin 2-1 in hnehna an chang.
Sergio Ramos hian hun tawp dawn tepah draw na goal a khung leh hram. Kha tia goal a khung lai khan minute 92 leh second 34 a ni tawh.
Extra time ah Dani Carvajal chuan hnehna goal a khung a ni. 2-1 in Real Madrid lamin hnehna an chang.
Real Madrid a chhuahsan tak tak a nih chuan a ngaihdawm dawn hle mai.
Source goal