Rasmus Hojlund chuan Manchester United a zawm châk tawh hle a, club hotute hnenah chhuah a dil niin report chuan a tarlang.
Kum 20 chauha la upa striker hi Manchester United chuan kar engemaw zah chhung an lo ngaihven tawh a, mimal thilah inremna an neihpui tawh bawk. Amaherawhchu player manah club pahnihte an la inrem fel thei mai lova, tun thlenga Hojlund an Manchester lam a la pan theihloh chhan pawh a ni.
Danish striker lâkluh tum hian Man Utd chuan £40 million bid theh lut tawh mahse hnâwl a ni a, Atalanta lam chuan an forward manah hian Red Devils offer let hnih aia tam mah £85 million an phut nia sawi a ni!
Man Utd in Hojlund la dawr chhunzawm zel mahse an lalut dawn em hriat a ni lova, Atalanta striker manah hian sum thahnem tak an theh chhuak phal ang em tih chu zawhna a chhanna hriatloh a ni mêk.
Hetih mêk lai hian Hojlund chuan Atalanta chhuahsana Man Utd a zawm theihnan tan a lo la ve mêk a, club hotute hnenah chhuah a dil a, amah chu Man Utd lama hralhchhuak turin Atalanta hotute a hrilh niin Gazetta dello Sport chuan a tarlang.
Tun hnaia report chuan Man Utd in Hojlund bakah Eintracht Frankfurt forward Randal Kolo Muani an ngaihven thar dawn niin a tarlang. Muani hian 2022/23 season kha a hmang tha em em a, a team tan inelna hrang hranga game 45 a inlan atangin goal 23 leh assist vawi 14 a thawkchhuak.
Man Utd in kuminah an squad thawmtha turin Mason Mount an lalut tawh a, Inter Milan goalkeeper Andre Onana an lalut fel tep bawk. Tuna an la hmabak chu striker thar lâkluh a ni a, nipui bazar inkhar hma ngei in Red Devils chuan striker thar naupang lam an nei ngei dawn niin a lang.