Marcus Rashford chuan Manchester United ah contract thar a ziak dawn a, Red Devils player hlawh tam ber a ni hnai.
Contract thar chungchangah Man Utd leh Marcus Rashford te chu a thuphunga inremna an neih fel thu Athletic chuan a tarlang a, nakkuma a contract neihlai hmang zo tawh mai tur English forward hian kum 2028 thleng daih tur Old Trafford ah contract thar a ziak ang.
Paris Saint Germain bakah European club lian thenkhat te’n Rashford hi an duh hle a, hlawh pawh Man Utd lam aiin an offer tam zawk nia report a ni. Amaherawhchu kum 25 a upa forward hian a lo inzirchhuahna Man Utd tana khel chhunzawm zel turin thutlûkna a siam fel. Man Utd a Rashford a la cham zel tur hi club tana thu lawmawm tak a ni chiang e.
Erik Ten Hag an Man Utd head coach hna a thawh hnuin Rashford version tha ber kan hmu a, season hmasa khan Red Devils tan inelna hrang hrangah goal 30 khungin 2012/13 season a Van Persie an Man Utd tana goal 30 a khung tlin hnua khung leh thei hmasa ber a ni nghe nghe.
Rashford hian tun atanga ni reilote hnuah kum 5 dang daih tur contract thar a ziak dawn a, a contract tharah hian kartin £3,75,000 a hlawh tawh dawn niin The Sun leh Daily Mail te chuan an report.
Man Utd a hlawh tam ber ni thin David De Gea an Old Trafford a chhuahsan fel tawh a, tunah chuan Rashford hi Red Devils player hlawh tam ber tur ni tawh dawnin player dang tha tak tak Casemiro, Bruno Fernandes leh Raphael Varane te ai pawha hlawh tam tur a ni!