Marcus Rashford chuan Manchester United a cham chhunzawm zel turin kum 5 dang daih tur contract thar a ziak a, kum 25 a upa hian Old Trafford ah 2028 June thla thleng contract a nei tawh.
English international hian Man Utd ah engzah nge a hlawh dawn chiang taka tarlan nilo mahse Daily Mail leh The Sun te chuan kartin £3,75,000 a hlawh tur thu an tarlang a, chu chuan Man Utd player hlawh tam ber a nihtir bawk.
Rashford hian contract thar a ziah hnuin hetiang hian a lawm thu club website kaltlangin a sawichhuak, “Mipa naupang kum 7 mi lek ka nih in Manchester United hi ka zawm a, he kawr ha tura zahawmna ka neih apiangin phurna, inchhuanna leh tumruhna ngai te’n hlawhtlin châk in min hnuk kal thin.”
“He club ropui takah hian tawnhriat duhawm tak tak ka lo nei nual tawh a, mahse hlen tur tam tak kan la hmabak avangin kan hma kum lo awm turah te hian hlawhtlinna nasa zawk chang turin tan ka la dawn a ni”
“Kan thlen theih tur level thleng turin ka theihna zawng zawng ka hlan dawn tih hi ka tiam duh che u a, tuna kan manager hnuaiah hian kan hma hun tur atan ka phur tawh takzet bawk” a ti.
Man Utd academy chhuak hi Paris Saint Germain bakah European club lian thenkhat te’n lâkluh tum mahse a player berin a lo inzirchhuahna club tana la khelh zel a duh a, Old Trafford a cham chhunzawm turin thutlûkna a siam fel a ni.
Marcus Rashford hi season hmasa a Red Devils player pawimawh ber te zînga mi a ni a, a team tan inelna hrang hranga game 56 a inlan atangin goal 30 leh assist vawi 9 a thawkchhuak a, 2012/13 season hnua Man Utd player season khata goal 30 khung tling leh thei hmasa ber a ni nghe nghe bawk.
