Paris Saint Germain defender Sergio Ramos chuan zanin khan social media kaltlangin a ram Spain tana inkhelh a chawlhsan thu a puang.
Ramos an ram tana inkhelh a chawlhsan chhan chu tudang nilovin Spain head coach Luis de la Feunte vang a ni. Luis Enrique thlaktu Feunte hian Ramos chu phone call a bia in a ruahmanna a a tel tawh loh thu tlang takin a hrilh.
Kum 36 a upa Ramos hi La Roja tana game khel tam ber niin Spain kawr hain match 180 lai a khel a, kum 17 chuang a inlan bawk. Real Madrid captain hlui hian Spain tan European Championship pahnih a chawi bakah kum 2010 khan World Cup a chawi bawk.
Club lamah pawh Spanish legend hian hun rei tak a nei tawh lova, Paris Saint Germain in contract thar an zawrh lo emaw amah in contract thar a ziak lo anih chuan June thlaah free agent a ni ang.
Spanish international hlui hi season hmasa lamah hliam in a tihbuai nasat avangin club tan a inkhel tam lo em em a, tun season ah erawh manager Christophe Galtier chhawr ngun ber te zinga mi niin Ligue 1 champion tan game 31 (all competition) a inlan tawh. Ronaldo khelhna Al Nassr lam chuan Ramos hi an ngaihven nia sawi a ni a, chutihrualin season hmang tha tak Ramos hian contract thar a ziah ngei a rinawm.
