Ram tana fehchhuak zingah Barcelona player pathum inhliam

Ram aiawha inkhel tura fehchhuak Barcelona player pathum Jules Kounde, Ousmane Dembele leh Memphis Depay te chu nizan khan an inhliam.

Heng player pathum te hian nizan khan Nations League match ah an ram theuh te hnehna an chanpui a, 2-0 in France in Austria an hneh mai bakah Netherlands lam chuan 2-0 in Poland an hneh ve bawk. An team te’n point 3 hlu tak an hlawhchhuah zan ni mahse player pathum te erawh in vanduaithlak takin hliam an tawk thung.

Warsaw ah Memphis Depay hi kaihza hliam avangin minute 49-na ah Vincent Janssen chuan a rawn thlak. Paris lamah ve thung hian Jules Kounde chu minute 23-na a lakchhuah a ni a, hun tawp dawn minute 10 la awm a rawn lut Ousmane Dembele chu inkhelh zawh hma in tihrawl na a nei tih hriat a ni bawk.

”Memphis hi kan game leha Belgium kan hmachhawn hunah a inlan theih ka ring lo” tiin Poland an hneh zawh khan Netherlands manager Luis van Gaal-an an forward chu an game khelh leh tura chhawr theih anih loh tur thu a sawi.

Vanneih thlak takin Dembele inhliam hi tun tum chu a na lo hlauh a, Depay hian Belgium hmachhawn thei dawn lo mahse a hliam hi a dam vat beisei a ni a, a lokir leh thuai tura ngaih pawh a ni. Transfer bazar-a Barcelona lakluh thar Kounde erawh a hliam hian hun rei a awh maithei thu journalist Marta Ramon chuan a tarlang thung. Memphis Depay leh Jules Kounde te hian an hliam te endik turin nizan kan Barcelona lam an pan nghal.

Related Posts

error: Content is protected !!