Queen Elizabeth II thihna avangin kartawp Premier League leh EFL match sawn hlat anni maithei

Queen Elizabeth II thihna avangin tunkar tawp Inrinni leh Pathianni a khelh tur Premier League leh EFL match te chu sawn hlat anni maithei. Buckingham Palace lam chuan nimin lam khan thuchhuah an rawn nei a, Queen Elizabeth II chu kum 96 a upa niin Balmoral ah a boral.

EFL lam chuan sawkrar leh Sports lama thuneitu deuh te hmuh an duh a, match khelhtur sawn hlat anih leh nih loh tur chungchang an rel ho dawn a, thutlukna pawh an siam thuai rin a ni. Zirtawpa inkhel tur Burnley, Norwich, Tranmere leh Stockport te game chu thulh phawt a ni dawn bawk.

Premier League lam pawh an ram lal thihna chuan an nghawng em em a, club tin te’n an tawrhpuina thu an tarlang.

EFL Chairman, Rick Parry chuan an lalnu thihna avanga an tawrh thu sawiin,”Vawiin ni a Queen Elizabeth II boralna thu kan hria hi EFL chuan kan tuar hle. Kum 70 chuang a lal chhung khan United Kingdom tan hian thil ropui tak a ti a, kan inpumkhat theihnan hna tam tak a thawk bawk. Lalnu hian infiamna a ngaina a, FA Cup final vawi tam a hmunah en in he ram chunga ro a rel chhung khan nasa takin infiamna lamah hma kan sawn. He League aiawh a ka sawi duh chu Queen Elizabeth II boralna avanga ramchhung mipui zawng zawng leh khawvel hmun hrang hranga mite tawrhna kan tawmpui e” a ti.

Official takin la chhuah lo mahse tunkar tawp inkhel tur Premier League, EFL , Women’s Super League leh Women’s Championship te chu sawn hlat ngei an nih a rinawm.

error: Content is protected !!