Manchester United in Europa League atanga Barcelona an petchhuah hnuin club legend Paul Scholes chuan Erik Ten Hag leh a nau te chu tun season a trophy 4 ngawt chawi thei tur an nih thu a sawichhuak.
Red Devils hian nizan khan an khelmual Old Trafford ah Laliga hmahruaitu Barcelona chu Europa League last 16 play off 2nd leg ah 2-1 in an hneh a, 4-3 aggregate niin round of 16 an inhlangkai a, tuna an chet dan thlirin Europa League chawi tura rinkai ber anni mek.
Man Utd hian tun Pathianni zan dar 10;00 ah Newcastle United an hmachhawn dawn a, team pahnihte’n EFL Carabao Cup an inchuh ang. Ten Hag leh a nau te hian FA Cup lamah beisei tur an la neih bakah Premier League table ah pathumna ni mek in a chung bera awm Arsenal chu point 5 in an phak lo.
Manchester United legend Paul Scholes chuan Erik Ten Hag hnuaia team hmasawn tak Man Utd tan quadruple beiseina a la nung zel thu a sawi a, chutihrualin season khata trophy pali ngawt chawi chu thil awiai a nih loh tur thu a sawi tel bawk.
Scholes chuan,”Quadruple beiseina a la nung zel e! Tun season Europe top 5 league ah keini chauh hi quadruple hlawhchhuak thei tur kan la ni a, chu beiseina chu hmuh theih pawh in a awm a ni. Chutihrualin heng hlawhtlinna zawng zawng chan hi a harsa hle dawn a, mahse enge thleng zel dawn tih tuin nge hria?” a ti.
Dutch manager Erik Ten Hag hnuaia team hmasawn tak Manchester United hian tun season ah nomawi 4 ngawt an hui theih kan ring em?
