Paris Saint-Germain (PSG) boss Mauricio Pochettino chuan a star forward Lionel Messi chu a fak hle a ‘Khawvel player tha ber’ a ni tiin a sawi.
Summer transfer lai khan Lionel Messi chuan Camp Nou chhuahsanin Paris Saint-Germain a zawm a, league games vawi 5 a khelh hmasak atangin goal a khung lo vek a, mahse, nizanah erawh a vawikhatna atan league goal a khung ve ta a ni.
Nizan Ligue 1 match khelhah Paris Saint-Germain chuan Nantes an hmachhawn a, 3-1 in hnehna an chang. Lionel Messi pawh league goal 1 na a khung ve bawk. Tunah hian PSG chu Ligue 1 hmahruaitu niin games 14 khelh tawhah point 12 lai maiin hma an hruai mek.
Inkhelh zawhah Lionel Messi chungchang zawhna chhangin PSG boss Mauricio Pochettino chuan ti hian post match press conference-ah a sawi.
“League goal a khung loh avang khan a a mangang ang tih ka ring lo hrim hrim. Champion ropui tak a ni a, khawvel player tha ber a ni bawk. Hun khirh tak a hman mek pawh hi a hria, a dawhtheih a, goal a khung ta nghe nghe, a tha tak zet a ni.” tiin a sawi.
Pochettino chuan Parisians star trio Lionel Messi, Kylian Mbappe leh Neymar jr te chu ropui taka che tur chuan an la nghah ve rih a ngai dawn niin a sawi.
“First half-ah khan kan khel tha tak zet. Messi, Neymar leh Mbappe te bikah hian an inpawhtha em tih zawhna ka nei reng thin, hun hman tam an mamawh a, match harsa an khelh tam pawh a ngai a ni. Mahse, squad te an khel tha vek a, first half-ah goal khat ai tam kan khung theilo erawh a zahthlak hle.” tiin a sawi.
Source SL