Al Nassr in season thar atana inbuatsaihna pre season tour an nei chho mêk a, an game leh ah Paris Saint Germain leh Inter Milan te chu Japan ah an hmachhawn ang.
Ronaldo leh a temmate te hi an pre season game hnuhnung pahnih ah te an mualpho hle a, 5-1 a Spanish club Celta Vigo an hnehloh hnuin 4-0 laiin Portuguese club Benfica lakah an mualpho zui.
An game hnuhung pahnih ah te mualpho takin hun hmang mahse Japan a an pre season game leh turah erawh Al Nassr leh Ronaldo te an phur tlang hle a, Japan mipui leh khawvel hmun hrang hrang atanga an inkhel entute tana inkhel hmuhnawm phochhuah an tum.
Ronaldo chuan, “He hmuna kan awm thei hi kan lawm hle a, Japan a Al Nassr team lo zin tumkhatna a ni. Game tha tak tak pahnih khelh tur kan nei a, kan phur tawh hle. Japanese mipuite hian football hi an tuichilh em em a, keini pawhin hmuhnawm chhawpchhuah ngei kan tum a ni.”
Kum 38 a upa hian season thara an thil tum te sawi leh in, “Trophy awm zawng zawng chawi kan inbeisei. A harsa dawn tih kan hria a, mahse team tha tak kan nei. Coach thar leh player thar te nen season ropui tak hman kan tum dawn. Keipawhin kumin chu trophy chawi tawh ngei ka duh” a ti.
Man Utd-a a contract tihtawp sak anih hnuin Ronaldo hian kumin kum tirh khan Al Nassr a zawm a, Saudi Pro League-a a season khatna ah trophy a chawi lo. Al Nassr in kuminah an squad thawmtha in player thar an lalut nual a, chung zinga a hming lian ber chu Croatian international leh Inter Milan midfielder hlui Marcelo Brozovic a ni. Ronaldo leh a pawlte hian season tharah trophy chawi ngei tumin an bei dawn.
