Lionel Messi chu Barcelona-ah a cham chhunzawm dawn lo tih a chian hnu lawkah, Argentina captain hi French club sum ngah Paris Saint-Germain chuan an lalut dawn niin a langa, Messi hian PSG a zawm a nih chuan a hlawh tlem dawn lo hle.
PSG hian Messi hi kum hnih daih contract ziahpuia, season khat chhunga pound maktaduai 25 hlawh tir an tum niin sawi a ni a, season hnih chhungin Messi hian pound maktaduai 50 a hlawh chhuak tihna a ni.
PSG hian kum 2023 June thla thleng daih contract an ziahpui bakah, Messi-a contract hi a kum 2024 June thla thlenga pawh sei belh theihna an nei dawn niin sawi a ni bawk.
Messi tlangzarh nan hian PSG chuan Eiffel Tower chu tun thla ni 10 atan an book fel tawh niin French chanchinbu te chuan an tarlanga, heti ang tho hian Neymar an lak tum pawh khan PSG hian an lo ti tawh.
Messi hi PSG bakin an dawr tak tak lo niin a langa, Messi nena sawizawm ber Manchester City lam lahin an ngaihven tawh lova, PSG hian a thlawnin Ballon d’Or vawi ruk la thei awmchhun Messi hi an lalut ngei dawnin a lang a ni.
Source 90Min