Moanco an hnehloh zana a teammate te a sawisel hnuin Neymar chu Paris Saint Germain hotute’n a hma thei ang bera hralhchhuah an duh a, nipui bazar inhawn hunah an player hralhchhuah tur list ah an dan niin Foot Mercato chuan a tarlang.
World Cup zawh hnuin club tan Neymar a che tha hleithei lova, an game hnuhnung bera 3-1 a Monaco an hnehloh tumin a teammate te pahnih Vitinha leh Hugo Ekitike te a sawisel a, club sporting director Luis Campos nen an inhnial bawk nia sawi a ni.
Neymar hian Parc des Princes ah kum 2027 thleng contract a la nei a, kum 5 a lo khelhpui tawh Kylian Mbappe nen an inkar thu a chhe viau bawk nia report a ni.
Kum 31 a upa hian 2017 khan euro 222 million in Barcelona atangin Paris Saint Germain hi a zawm a, Ligue 1 champion tan hian game 171 a inlan atangin goal 117 leh assist vawi 76 a nei tawh bawk.
Brazil international hi Premier League club lian pathum Chelsea, Manchester United leh Manchester City te nena sawizawm anni a, amaherawhchu Premier League club lian te hian Neymar chungchangah official bid an la thehlut lo thung.
Christophe Galtier nau te hian naktuk zanlai ah Bayern Munich chu UEFA Champions League Round of 16 1st leg ah an hmachhawn dawn a, an forward tha pathum Neymar, Mbappe leh Messi te chu squad ah an tel kim.
