Paris Saint Germain lamin France striker Kylian Mbappe an contract thar a ziah loh chuan kuminah an hralhchhuah tur thu an sawi chian hnuin a transfer man tur an bituk a, kum 24 a upa manah hian Ligue 1 champion chuan €200 million an chhiar nia report a ni.
Mbappe hian contract thar a ziah loh tur thu club hotute a hrilh chiang a, hetiang anih takah chuan French champion pawhin an star hi hralhchhuah ngei an tum dawn.
Mbappe lakah PSG president Nasser Al Khelaifi a lungni lo hle nghe nghe a, an striker hian a thlawna chlub a chhuahsan loh tur a sawi bakah tun thla ral hma ngei a a hma hun tur chungchangah thutlukna tawp a siam a ngaih thu tun hnai mai khan reporter te hma ah a sawichhuak.
RMC Sport tarlan danin France champion hian an striker club a season khat bak contract nei tawh lo manah €200 million an chhiar a, mahse heihi Real Madrid lam chuan pektlak an tum lo nia sawi a ni.
Real hian nikum khan Mbappe hi sign an lo tum tawh a, a manah €200 million dawn insen an inhuam nghe nghe. Amaherawhchu PSG lamin an striker hi contract mawm tawk tak an zawrh hnuin an chelhbet thei hram anih kha.
Kumin nipui bazar a lo inherchhuak a, Mbappe hi Real nena sawizawm leh ni mahse Los Blancos lam chuan official takin an dawr lova, €113 million a Jude Bellingham an sign tawh bakah loan in Spanish striker Joselu an lalut tawh bawk a, stadium sak that nana sum tam tak an inseng bawk nen, Mbappe hi season thar atan chuan club ruahmanna ah a tel lo nia sawi a ni.
Mbappe hian kuminah Parc des Princes chhuahsan a duh a, PSG lam pawhin an star player contract ziah tum tawh lo hi hralhchhuah an hnial bik lo. A buaithlak lai ber erawh Real Madrid in kuminah Mbappe lakluh tumna an nei lo hi a ni a, Mbappe lah in Real Madrid lo European club lian zawm duh a nei awm si lo. Engpawhnise France champion hian kuminah an hralhchhuak lo anih chuan nakkumah a thlawnin an chan dawn a, Mbappe chungchang hi an chinfel thuai a tul ang.