Manchester United nena sawizawm hlawh tak Rasmus Hojlund lakluh tumtu zingah Ligue 1 champion Paris Saint Germain an rawn tel thar ve leh ta e.
PSG hian kumin nipui bazarah Lionel Messi an chhuah zalen tawh a, an star player Kylian Mbappe pawhin contract thar a ziah loh chuan hralhchhuah ngei an duh.
Hetiang anih avangin an hmatawng tichak zual turin PSG chuan Atalanta rawlthar beiseiawm tak Hojlund an ngaihven thar a, Man Utd tan ngaihtha taka awm a theih ta lo!
Kum 20 a upa Danish striker hian season hmasa khan Atalanta tan league game 20 ah inkhelh bul tanin goal 10 a khung a, Euro 2024 qualifer ah Denmark tan game 4 a inlan atanga goal 6 khung tawh in he inelna-a goal khung tam ber a ni mek bawk.
Red Devils chuan Hojlund hi kumin nipui bazarah lakluh ngei tumin tan an la mek a, Dane striker manah hian £40 million thehchhuah inhuam mahse Atalanta lamin erawh an forward hi an chhiar to khawp a, a manah £85 million an phut nia report a ni. Hetiang zata tan sum hi Man Utd mai nilo, PSG lam pawh hian an theh chhuak phal ang em tih chu zawhna awm mek a ni bawk.
Man Utd hian Hojlund an buaipui tak tak hma in Andre Onana transfer tihfel phawt an duh a, an buaina ber erawh player transfer fee ah a ni leh.
Red Devils hian Onana manah £43 million theh chhuah an inhuam laiin Inter lamin erawh £51 an beisei thung a, club pahnihte la inrem thei lo mahse inbiakna erawh kalpui chhunzawm zel a ni thung.
Ten Hag an kuminah player thar lakluh nan £120 million bak pawisa hman tur a nei lo nia report a ni a, Mount lakluh nan £60 million an theh chhuak tawh nen, striker leh goalkeeper thar lakluh nan £60 million chauh chu a beitham deuh dawn a, chuvangin an player kawllai thenkhat hralhna atang sum an hailuh ngei a ngai ang.
